لا تشتري مشروع لانك تحبه

وايد ناس يبون يشترون مشروع، والسبب؟

أنا أحب هذا المجال، أو أحسّه يناسبني، أو أحب الكافيهات والمطاعم فـ بشتري كافيه

خلني أقولك شي من القلب

مو كل شي تحبه = مشروع يربحك

ليش؟

لأن في فرق كبير بين تشتري منتج

وبين تدير مشروع كامل وتركّب عليه نظام وتخاطب فيه جمهور وتتعامل مع فريق وتشغيل وتكلفة وزحمة يومية ومشاكل وموردين وادارة اموال وتراخيص وقوانين و و و و و و و و

أنا دايم أقولها

الشراء العاطفي = أكبر خطأ نشوفه في مُشتري

وهذا الي صار معاي شخصياً في خسارتي الاولى والي كلفتني مئات الالاف الدنانير

وايد ناس خسروا فلوسهم لأنهم اشتروا شي يحبونه، بس ما درسوا السوق، ولا عرفوا الأرقام، ولا جهزوا نفسهم للي ورا الكواليس

واللي يزيد الطين بلّة؟

ناس تقلد مشاريع غيرها، شفت مطعم فلان ناجح، خل أفتح مثله

بس ينسى إن فلان عنده شبكة علاقات، وعنده طاقم تشغيل، ويمكن عنده تمويل

المشروع مو منتج

المشروع منظومة كاملة، لازم تتجهز لها صح، وتعرف ليش تشتري، ومتى، وشنو هدفك من الشراء

هل تبي تبنيه وتطوّره؟

ولا بس تشتريه وتبيعه بعد سنة؟

ولا تبيه مصدر دخل شبه ثابت؟

كل هدف له نوع مختلف من المشاريع، وطريقة تشغيل وتسعير وتقييم مختلفة

فلا تشتري مشروع لأنك تحبه… اشترِ مشروع لأنك جاهز له

وإذا ما كنت جاهز؟ 

خذ وقتك… تعلّم… اسأل… استشر

لأن شراء مشروع مو قرار بسيط …. هو قرار يغيّر وقتك، مالك، وحتى مزاجك اليومي

ختامًا

الناجحين ما يركضون ورا اللي يحبونه

يركضون ورا اللي يفهمونه، ويضيف لهم، ويعرفون يتعاملون معاه

ما احب اشوف احد مايعرف او ضايع وانا عندي هذا العلم ولله الحمد، فـ شرايك اسوي ورشة اساسيات واسرار شراء المشاريع؟

اذا يهمك وتبي أسويها، رد على هذا الايميل واكتب … معاااااك

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها