نجاحك مو مشروط في حجم وعدد الفروع

قبل اسابيع، كنت أقدّم ورشة في البرنامج صيفي مع بوتيكات وكان الحضور أكثر من 90 مشارك ومشاركة، كلهم أصحاب مشاريع أو ناويين يبدون مشروعهم

خلال الورشة، عرفت ان في وحدة من المشاركين ان عندها مشروع تشتغل فيه على الطريقة اليدويه تسوي جنط ومحافظ بيدها وهذا القبيل، والشغل جداً جمييل

ونظامها ان كل جم شهر تسوي دفعة عددهم ٦٠ قطعه تقريباً وتعرضهم بالسوشيل ميديا وخلال ساعات كل القطع خالصه ما شاء الله وهذه ثالث او رابع مره تسويها

بعد الورشة، أسالتني

أبي أفتح محل، أحس مشروعي كبر ولازم أتوسع، أبي أدرس الفكرة

قلت لها: لحظة

يمكن نجاح مشروعج ان الناس قاعده تنطر ولان محسستهم ان القطع بتطير سريع ولحق ماتلحق وقاعد يشوفون هذا الشي فـ معيشتهم شعور الحصري والسريع

فـ لو فتحتي محل؟

يمكن تختفي هالمشاعر

يمكن الناس تقول: خلاص موجود بالمحل، آخذ بعدين وتضعف الرغبة، ويقل طلبهم

لازم تعرفين ان

مو كل نجاح = لازم تفتح محل

ومو كل توسّع = يعني راح تربح أكثر

الرسالة؟

بعض المشاريع تنجح لأنها صغيرة، لأنها نادرة، لأنها تلعب على فضول العميل

مو لأن عندها محل، أو إعلان كبير، أو تواجد بكل مكان

التوسع مو دايمًا هو الجواب، أحيانًا الصغر… هو القوّة

وصدقني، شفت هذا الشي بعيوني في أكثر من مشروع، ناس ركّزوا على التوسع، خسروا التوازن، وضاعت الأرباح وناس حافظوا على الخصوصية والبساطة… وربحوا أكثر.

فـ قبل لا تفكر تكبر… فكّر

شنو جوهر نجاحك؟

وشلون تحافظ عليه حتى لو كبرت؟

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها