خل اقولك شي محد قاله لي بالبداية

تبي تسوي مشروع؟

أغلب الناس تكتب لك شلون تبدأ مشروعك من فكرة، خطة، دراسة، تمويل

بس خل أقولك شي محد قاله لي لما بديت أول مشروع بحياتي

الأصعب مو البداية… الصعب إنك تعرف من وين تبدأ وأنت مو فاهم نفسك ولا تعرف شنو تبي بالضبط

أنا خسرت أول مشروع، مو لأني ما عندي شغف ولا لأني ما تعبت عليه ولا ركزت، خسرته لأني دخلت مشروع ما يناسبني ولا افهم فيه

ما كنت فاهم وين قوتي، ولا شنو المهارات اللي أقدر أستخدمها

كنت متحمّس، بس مو واعي

وهذا اللي يطيح فيه أغلب اصحاب المشاريع، وهذا مو كلامي بس، هذا بناءً على البيانات الي عندنا في مُشتري واشوفها بشكل يومي

تبدأ بحماس، بدون وعي، بدون وضوح، بدون تخطيط وفهم يناسب صاحبها

اليوم، خلال ورشات الأكاديمية اللي قاعدين نقدمها، دايم أكرر هالجملة

قبل لا تختار فكرة مشروعك… اختار نفسك أول، افهم نفسك ووين قوتك ووين طموحك

وأكثر شي يفرحني لما أشوف أحد مسجلين الدورات، بعد جم أسبوع، فعلاً اختار فكرة مناسبة له وللسوق، وبدأ يشتغل عليها ما شاء الله

ومعلومه حصريه، حتى في أحد أعضاء مجتمع مُشتري لرواد الاعمال، حضر الغبقة، واليوم قاعد يفاوض على أول استثمار لمشروعه ما شاء الله

رسالتي ونصيحتي لك، اسأل نفسك

شنو تعرف تسوي؟ شنو تحب؟ شنو عندك علاقات فيه؟

وشنو تقدر تتحمّله لو تأخر النجاح؟

لا تختار المشروع اللي الناس نجحوا فيه

اختار المشروع اللي ينجح فيك

اتمنى لك كل التوفيق والنجاح يارب

اخوك

شرايك بنشرة اليوم ؟

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها