لاتخلي السوق يختار لك مصير مشروعك

وايد مشاريع بدايتها تكون قوية لكن بعد سنة، تلقى صاحبها ضاع وتشتت، مبيعاته نزلت، وموعارف شنو القرار الصح

ليش؟

لأنه من البداية ما حدد شنو هدفه من المشروع

هل هدفك تدخل فلوس شهرية ثابتة؟

ولا تبي تبني مشروع وتبيعه بعد فترة؟

ولا تبيه بزنس يكبر معاك سنة عن سنة وتبني له علامة تجارية؟

كل واحد من هذه الاهداف له طريقة تشغيل، تسعير، واختيار مختلف تماماً

بس اللي يصير غالبًا؟

الواحد يبدأ بدون هدف واضح

والسوق هو اللي يفرض عليه طريقة الشغل، وأسلوب التشغيل، وحتى نوع العميل اللي يخدمه

وهني تكون الكارثة… لأنك تصير تشتغل في مشروعك كأنك موظف، مو كصاحب قرار

أنا شخصيًا جرّبت الشي هذا في أول مشروع لي بديت وأنا بس أبي “أفتح مطعم” وخلاص

ما حددت إذا أبي أربح شهريًا، أو أبي أبيعه بعد سنة، أو أبي أفتح له فرع ثاني

والنتيجة؟ ضياع بالهوية، تعب، وقرارات كثيرة غلط

تعلمت إن من أوّل يوم… لازم أعرف أنا ليش قاعد أبدأ هذا المشروع؟

لأن هالسؤال هو اللي راح يحدد كل قراراتي القادمة

السوق ما يرحم اللي ما يعرف وين رايح

فـ قبل لا تبدأ أو حتى قبل لا تكمل

اسأل نفسك، شنو أبي من مشروعي؟

شنو هدفي بعد ٦ شهور؟ سنة؟ ٣ سنوات؟

وابني كل شي على هالأساس: التسويق، الفريق، التسعير، وحتى نوع الخدمة

اللي يعرف وين رايح، يقدر يوصل لو مهما كان درب الرحلة

واللي يمشي بدون هدف؟ السوق راح يوصله مكان ما يبيه

هذا درس تعلمته بحياتي وقلت اشاركك فيه عشان لاتغلط نفسي

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها