لا تسعر منتجاتك على كيفك

ادري هذا مشروعك وحلالك، بس ركز معاي للاخير

وايد أصحاب مشاريع أول ما يبدون، يسعرون منتجاتهم أو خدماتهم بـ ٣ طرق

يسعر أرخص من السوق والمنافسين عشان كل الناس تشتري منه - على فرضيته

يسعر على حسب الكلفة + هامش بسيط

أو يسأل أحد ويقوله سعّر جذي احسه مناسب

تبي الصج والواقع؟
 السعر مو بمزاجك ولا رأيك الخاص… السعر قرار استراتيجي بحث وعلى اساسه تكبر او تصغر وتسكر

خل أقولك قصة صارت فعلاً

واحد من الشباب فتح مشروع بسيط يبيع منتجات يدويّة
كل شي كان ممتاز… بس قاعد يخسر
ليش؟
لأنه حسب الكلفة، وزاد عليها ٢٠٪، وقال: هذا هامش ربحي

بس اللي نسااااه

١- ما حسب وقته وجهده

٢- ما حط حساب لمصاريف التشغيل الثابتة

٣- ما راقب السوق، والمنافسين قاعدين يبيعون أغلى وبنفس الجودة

٤- والاهم… نسى إن الناس ما تشتري بس على السعر، تشتري على القيمة

اللي صار؟
أول ما اشتغلنا معاه، درسنا منو العملاء وشنو هويتهم وشكلهم واهتمامهم وشنو ضج يبون يحسون فيه من يشترون هذا المنتج، فعدلنا التسعير، واضطرينا نرفع الاسعار

ماكان القرار سهل، لان طبيعي راح تخسر عملاء من ترفع السعر و مو دايماً رفعة الاسعار اهيا الحل الاساسي او السحري لمعالجة الخلل والنزيف، ولكن في هذه الحاله كانت رفعة الاسعار اساس لان كوالتي المنتج يتطلب يوصل للناس بشكل وصورة معينه عشان الناس تحس بقيمته، وابشركم زدنا مبيعاته ولله الحمد

التسويق والبيع عبارة عن مشاعر وقيم مضافة فضروري تفهم السيكولوجية للعميل للخدمة والمنتج الي قاعد تقدمة وتبيعه

تسعيرك لازم يراعي

١- وضع السوق

٢- شريحة عملائك

٣- القيمة اللي تقدمها

٤- قدرتك على التوسع والربحية

السعر مو بس رقم تحطه، السعر يقول للناس شنو قيمة مشروعك، ومنو قاعد تخاطب

فلا تسعر مشروعك على راحتك… لأن السعر مو عن راحتك، السعر عن السوق، والعميل، ومستقبل مشروعك

هذا فيديو مختصر اتكلم فيه عن التسعير، شوفه (اضغط هنا)

وهذا فيديو ثاني أتكلم عن الي يسوي خصم عشوائي ويبيع واخر شي يطلع خسران (اضغط هنا)

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها