هل احتاج فكرة عبقرية عشان اسوي مشروعي؟

ليش المشروع الناجح ما يبدأ دايماً من فكرة عبقرية ؟

أغلب الناس لما يكلّموني عن مشاريعهم، يبدأون بجملة

…..عندي فكرة وايد قوية

وكل مرة أبتسم، مو تقليل من فكرتهم، بس لأني شفت شي مختلف تمامًا في الواقع

النجاح ما يعتمد على الفكرة… يعتمد على التنفيذ، على الفريق، على المرونة، وعلى استعدادك للواقع.

وايد من المشاريع الناجحة ما بدأت من ولا فكرة عبقرية

بدأت من حاجة واضحة، من مشكلة بالسوق، من فرصة مرت على صاحبها وهو جاهز يتحرك

أذكر أحد المشاريع اللي اشتغلنا عليها في مُشتري

فكرته كانت جداً عادية، لكن صاحب المشروع كان

١-سريع بالحركة

٢-واضح بالتشغيل

٣- يسمع ويتقبل التغيير

واليوم؟ قاعد يفاوض على بيع مشروعه بسعر عمره ما كان يتخيله

أنا بنفسي جربت أبدأ بمشاريع كانت فكرتها واو

لكن لما دخلت السوق، لقيت نفسي مو جاهز… فشل المشروع

وتعلمت ان الفكرة مهمة، بس مو كفاية

اللي يصنع الفرق هو شلون تنفذ، شلون تبني سيستم، وشلون تتعامل مع كل تغير بالسوق

يمكن تقول شدعوه عبدالله بس هذا السبب؟ اكيد لا، في عوامل تساعد على نجاح المشاريع مثل التسويق وفهم المبيعات والادارة وغيييره اكيد، بس منو اساس المشروع؟ منو الي ياخذ قرارات ؟ منو الي يحط الاستراتيجيه؟ منو الي اختار الفكره ؟ منو الي بيده يغير طريق المشروع اذا شاف في مشكله بالسوق ويقدر يحلها ؟ صاحب المشروع !!! ف مايهمني اتكلم عن التسويق او مبيعات او ادارة قبل ما اقول شكثر العقلية والتنفيذ السريع واتخاذ القرارات وعدم تأجيلها انها مهمه واساس في النجاح

انا قاعد اكتب هل كلام لان شفت وااااايد ناس يتأخرون ويتحلطمون ويحسون انهم اقل ذكاء لان ماعندهم “فكرة عبقرية” يشتغلون عليها

ابدأ، افهم، اسمع، جرّب… والفرص راح تبين لك وحدة وحدة

ولاننا قاعدين نشوف النماذج هذه كل فتره في دورات اكاديمية مُشتري، صارت عندنا قناعة ان الفكر مو كافي، لازم نية وفعل واستعداد للواقع

الريادة مو اختراع… الريادة حل بذكاء

كل مشروع ناجح اليوم، كان في يوم من الأيام “فكرة عادية” — الفرق؟ صاحبه كان جاهز

اتمنى لك كل التوفيق والنجاح يارب

اخوك

شرايك بنشرة اليوم ؟

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها