بتسوي مشروع ؟ لاتسوي هذا الخطأ

وايد ناس تبدي مشروعها بناءً على شي واحد

أنا أحب هذا الشي، فليش ما أفتح مشروع فيه؟

لكن السؤال المهم

هل السوق يحبّه؟ هل الناس مستعدة تدفع عليه؟ ولا بس أنت تحبه؟

أنا وايد شفت مشاريع فيها شغف كبير بس مافي طلب كافي، أو العميل مو مستعد يدفع ويصرف على هذا المنتج او الخدمة

الحب شي حلو… بس مو دايم يبيع

وفي شي ثاني أشوفه دايم يتكرر

صديقي فتح مشروع ونجح، خل نفتحه نفسه

أو: أنا أحب الكوفي شوب، ليش ما أفتح كوفي شوب؟

بس اللي يجهلونه… إن حتى لو المشروع نفسه فيه آلاف التفاصيل اللي تخليه ينجح أو يفشل

هذا عرف يسوق… الثاني لا-

هذا عنده شبكة علاقات… الثاني توّه يبدأ-

هذا عرف يختار موقع ممتاز… الثاني اختار مكان ميت-

حتى العميل اللي يشتري، مو نفسه-

فـ لا تقلد، ولا تقارن، ولا تعيش على نجاح غيرك

نعم، شوف السوق وتعلّم منه بس مو عشان تقلّد، عشان توسّع تفكيرك وتفتح مخّك

وفي نقطة صارت لي شخصيًا

أول مطعم فتحته؟ خسرت فيه، مو لأن الفكرة غلط، لكن لأني ما استشرت أحد

صح في اسباب ثانيه ادت الى الخسارة ولكن قبل ما اخذ الاسباب الثانيه ما كان المفروض استشير عشان اتجنب هذه الاسباب والخسائر ؟

لاني ما سألت أصحاب خبرة، ولا جهزت نفسي صح، كنت أشوف كل خطوة أصعب من اللي قبلها، وكل شي ياخذ من وقتي وطاقتي وأعصابي

وبالنهاية؟ دفعت الثمن

الف الحمدالله لا حسافه على اي شي، واصلا بعدها اكتسبت اجمل خبره وعلاقات ورزقه من بعد هذه الخساره ولكن ابي اوضح لك شكثر الاستشارة مهمه

لو راجعت مع مختصين أو استشرت أحد فاهم، كان اختصرت على نفسي تعب وشهور، وحتى فلوس

هل لما تبي تبني بيت، بتروح تسويه بروحك ؟ بدون مقاول ولا استشاري ؟

مثل الشي مايصير تبني مشروع بدون استشارة لأن المشروع مسؤولية، وفلوس، وعمر، فـ لازم تشتغل عليه وانت عارف شنو تسوي

ختامًا

المشروع الصح هو اللي يجمع بين ٣ أشياء

١- الرغبة (شنو تحب؟)

٢- القدرة (شنو تعرف تسوي؟)

٣- الطلب (شنو السوق يبي؟)

إذا اجتمعت، فرص نجاحك أعلى، وإذا وحدة منهم مفقودة؟ راح يكون الطريق أصعب

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها