تبي تبيع مشروعك؟ اسأل نفسك هذا السؤال

أغلب الناس اللي تفكر تبيع مشروعها، تسأل بجم أقدر أبيع؟

بس نادر اللي يسأل هل مشروعي جاهز للشراء أصلاً؟

مو كل مشروع قابل للبيع

ومو كل صاحب مشروع جاهز نفسياً وعملياً إنه يطلع من مشروعه

وايد مرات، نشوف ناس تبينا نبيع مشروعهم بس لما نغوص شوي… نلقى كل شي بالمشروع يعتمد عليه مافي نظام، مافي بيانات واضحة، ماكو فريق يقدر يكمل بعده

والمشتري؟

أول سؤال يخطر بباله، إذا صاحب المشروع طالع، شلون راح يكمل؟

أنا وايد تكلمت عن هالنقطة بدورات اكاديمية مُشتري وكنت مسوي دورة وماستر كلاس متخصص عن اسرار وفن بيع وشراء المشاريع قبل اسابيع واللي يحضر، يدري إني دايم أقول

فكّر كأنك المشتري، مو البايع، لازم تلبس قبعة غيرك وتشوفها من وجهة نظرة، الموضوع مو بس بالسعر ويلا منو يشتريه وجم يسوى

تبي تبيع صح؟

جهّز مشروعك كأنه منتج

واضح، بسيط، مغري، ويشتغل من غيرك

وأقولها من واقع اكثر من ٢١٥ صفقة سواها فريق مُشتري

الفرق بين مشروع ينباع خلال شهر وبين مشروع يقعد سنة وما أحد يلمسه هو الجاهزية

جاهزية التشغيل، جاهزية الأرقام، جاهزية العقلية

وأهم نقطة؟

لا تبيع لأنك تعبت، بيع لأنك جاهز تنتقل للمرحلة اللي بعدها

لأن اللي يبيع من تعب… يرضى بأقل شي

واللي يبيع وهو جاهز… يعرف شلون يفرض السعر اللي يستحقه

خلك مستعد، واشتغل من اليوم، حتى لو ناوي تبيع بعد سنة

كل يوم تعدّل وتبني فيه… يقربك من صفقة العمر

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها