مشاريع من صفر د.ك

مساك الله بالخير

اليوم رسالتي لك بتكون شوي طويلة عن المعتاد بس اوعدك بتطلع منها بفايدة جداً عظيمة، ركز معاي ضروري

هدفي اليوم اقولك شلون تسوي مشروع من غير راس مال. ادري الكل يظن ان اذا بسوي مشروع لازم يكون عندي فلوس!! لازم عندي راس مال كبير ف بدونه ما قدر أسوي مشروع!! اكيد غير صحيح

اعرف أصحاب مشاريع شخصياً اطلقوا مشاريعهم بدون ولا دينار انحط بالبداية واليوم شركاتهم فيها عشرات الموظفين ويبيعون بمئات الالاف

يمكن ما تصدقني وتقول ان الكلام سهل يا عبدالله .. ليش نروح بعيد ونقول فلان وفلان، تعال شوف اخوك عبدالله شلون اسست منصة مُشتري!! بدون ولا دينار!! بقولك شلون بشكل سريع

١- سوينا حساب انستغرام عام ٢٠٢٠ اسمه بزنس فور سيل

٢- عرضت فيه مطعمي للبيع

٣- مئات من اصحاب المشاريع تواصلوا عشان يعرضون مشاريع للبيع

٤- الالف من المبادرين والمستثمرين تواصلوا عشان يشترون ويستثمرون في هذه المشاريع اول سنتين

٥- صار في عرض وطلب وصار في سوق لبيع وشراء المشاريع (مو بهذه السهولة لان البداية كانت وايد صعبة ومحد كان يعرف شلون ابيع وشاري، استمرينا ولا استسلمنا وواجهنا وايد تحديات)

٦- بعد ٣ سنين قررنا نغير الهوية التجارية بعدة اسباب واهما نكبر الشركة ونتوسع مو بس مجرد صفحة انستغرام، واليوم صرنا مُشتري 

٧- اليوم ولله الحمد صار فريقنا يتكون من ١٥ بطل ونعتبر اكبر منصة لبيع وشراء المشاريع في الخليج، قدموا علينا الالاف من المشاريع وساعدنا اكثر من ٢٠٠ صاحب مشروع في بيع مشروعه والتخارج منه (انجاز كبير وعظيم بالنسبة لنا لان محد كان يقدر يسوي هذه الارقام ويساعد اصاحب المشاريع في بيع مشاريعهم ويساعد المبادرين والمستثمرين يحصلون فرص قوية يشترونها ويستثمرون فيها)

٨- واخر شي عشان ابيك تتحمس اكثر، تواصلوا معانا عشرات المستثمرين يرغبون بالاستثمار في مُشتري، والحمدلله اتفقنا وخلصنا اول جولة استثمارية قبل ٥ شهور تقريباً

ملاحظة

بعد هذه السنين والتجارب، راح ١٠٠٪ اشتري مشروع جاهز ولا اني اخوض هذه المخاطر والمعاناة في السنين الأولى لان المشروع ما يستقر الا بعد ٥ سنين على الأقل

انا اليوم هدفي من هذه الرسالة ان ابيك تكون مبادر وتشتغل على نفسك واثبت لك ان مو شرط يكون عندك راس مال عشان تسوي لك مشروع وشركة

شوف معاي شنوعندي لك من أفكار سهلة وعجيبة عشان تسوي لك مشروع بأقل التكاليف واسرع وقت

فري لانس – مهن حرة

كاتب محتوى / مسؤول حسابات ميديا / مساعد شخصي أونلاين / مدرس أونلاين / تنظيم حفلات ومعارض / حساب سوشيل ميديا للإعلان عن تغطيات وفعاليات / وسيط في بيع شراء سيارات عقارات بضائع وغيرهم

مشاريع تكنولوجية

تطبيق للرحالة والسفر / تطبيق لتنظيم وارسال دعوات / تطبيق لأنشطة الصيف والشتاء / تطبيق لسوق الكاكاو / تطبيق لوجبات الهوم بزنس / تطبيق لسوق للأواني المنزلية

مشاريع تقليدية

خدمة تنظيف بيوت / خدمة تنظيف سجاد / خدمة غسيل سيارات / تحضير وجبات للأطفال / خدمة صالون منزلي / تأجير مكاين بوب كورن وآيسكريم

هل الأفكار والمشاريع الي ذكرتهم لك فوق اسويهم من الصفر وبروحي ؟ اذا حصلت شي جاهز وشغال اكيد بشترية وماراح ابلش من الصفر

قتلك فوق ان انا راح اخذهم جاهزين ولا راح اسوي مشروع من الصفر ومادري اذا ينجح ولا لا

ف شوف معاي هذه الطريقتين الي بتقدر تأخذ مشروع جاهز ونجاحه شبة مضمون لان عنده مبيعات وقاعدة عملاء وزبائن وبنفس الوقت ما راح تدفع دينار واحد!!! كأنه قاعد تحلم وايد عبدالله ؟ شوف معاي

شراكة بالمجهود

إذا شفت مشروع عجبك ولكن ما تبي تدفع دينار واحد بس عندك وقت كافي انت تجابل وتشغله واديره، ادخل انت بجهدك و وقتك والشريك الثاني بفلوسه اذا احتاج المشروع راس مال وهذا انا سويته اكثر من مره

تمويل من صاحب المشروع

يعني صاحب المشروع الي بشتري منه مشروعه اقوله لو سمحت انا بعطيك السعر الي تبيه بس ابيك تقسط لي المبلغ على دفعات لمدة ٣ سنوات مثلا. انت تروح تبيع من ثاني يوم لان المشروع شغال وجاهز وبعدها تدفع له اقساطه، انت جذي ما دفعت ولا دينار عشان تشتري ويصير عندك مشروع

اكيد عندك أفكار احلى، شوف الي يناسبك وبسرعه اشتغل عليه. الوقت غالي لا تخسره

العلم والخبرة مهمين وضروري، نصيحة اخوك ابيك تتعلم الأساسيات ويكون عندك الأدوات الصح عشان مشروعك ينجح ويكبر

عشان جذي مسوي لك دورة تدريبية عميييقة حيل من خبرة سنين عن شراء وبيع المشاريع فيها بتعرف عن الخطوات الي تحتاج تخطيها ان كنت بايع وشاري عشان تكون في امان وتتجنب الاغلاط والاهم ان يكون عندك الأدوات الي لازم تستخدمها عشان ترتب امورك وتنجح

الدورة بقدمها انا اخوك عبدالله سليم بالتعاون مع مركز عبدالعزيز حمد الصقر للتنمية والتطوير (غرفة التجارة)

٣٠ / ٣١ شهر ٧

٥ عصراً – ٨ مساءً

مركز عبدالعزيز حمد الصقر للتنمية والتطوير (غرفة التجارة) اضغط هنا

إذا عندك أي استفسارات، أنا موجود معاك وبساعدك اضغط هنا

اتمنى لك كل التوفيق والنجاح يارب

اخوكم

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها