💙 صبحك الله بالخير

أول شي ابي اقول شكراً شكراً شكراً من القلب لكل من حضر الورشة ولكل من تشرفنا بشوفته وتفاعله وعبر لنا من قلبه عن الفايده الي استفادها من الورشة، شوفوا بعض من هذا الكلام العجيب

والله يشهد ان كنا مخصصين 50 مقعد فقط ولكن العدد تعدى ال 175 مسجل ومشارك ما شاء الله وهذا اكييد يشرفنا ويسعدنا ويزيد المسؤولية علينا عشان نجتهد اكثر واكثر فـ شكراً من القلب

بنشرة اليوم بقولك اهم خطوه واهم درس تعلمته في حياتي ومابي ابي انت تغلط فيه، وهذا اكثر شي شفته واستشفيته من الحضور في الورشة

الاغلب ما هو عارف من وين يبلش ولا عارف يسأل منو، بس متفقين ان السؤال اهو مفتاحك صح؟

مثل ما تكلمنا في الورشة ان لما احد يعزم على الزواج يروح يسأل امه، ابوه، اخوه، اخته واقرب الناس له ويسأل شنو لازم اجهز واشتري ومن وين وغيره من امور الواحد يجهل عنها فـ يلجأ للناس الي سبقوه في هذه الخطوه عدل ؟ متفقين ؟

نفس الشي بالضبط في اول خطوه لك في مشروعك!!! تسأل الناس الصح عشان تمشي بالدرب الصح

الكلام هذا لي ولك ولكل من بسوي له مشروع، ويبي يطور مشروعه ويبي يشتري ويبيع و ولكل واحد بياخذ خطوه

الاستشارة بتوفر عليك مشاكل انت غنى عنها وفلوس ووقت انت اولى فيهم

استشارة عامة

هذه اول خطوة تسويها وهدفها أنك تسمع كل النصائح الأساسية والأمور الواجب تتعلمها في التجارة وإدارة مشاريع تجارية، فتحتاج تضبط الأساسيات عشان تقدر تأخذ الدرب وانت عارف واجباتك واحتياطاتك ومجهز خططك، يعني مثل التوظيف، التدفق النقدي، التسويق والبيع، الامور القانونيه، وغيره

منو استشير فيها ؟

شخص يفهم بالتجارة والمشاريع، شخص عنده حسن الإدارة، شخص خاض سنين في ريادة الاعمال، جرب وتعلم وراح تستفيد وايد من خبرته ومسيرته

استشارة متخصصة

هدفها انك تسمع ناس شغاله في المجال نفسه وتبي تتعلم من خبرتهم ونصايحهم على سبيل المثال بتسوي مطعم، وااااايد مهم ترفع التلفون على احد عنده مطعم مو شخص عنده صالون !!! (لان مشروع عن مشروع يفرق)

تروح تأخذ استشارة مع شخص اشتغل في المطاعم، عنده علاقات مع المطاعم، يعرف معلومات كبيرة عن المطاعم لان تبي تعرف شنو اهم الصعوبات والمشاكل في تشغيل وإدارة مطعم وشنو اشياء اهو طاح فيها عشان انت ما تطيح فيها وشلون يدير المطعم وشنو عنده من أدوات بتساعدك في ادارتك وتطوير مشروعك

ختام الكلام

إذا عندك مشروع تبي تطوره أو ناوي تبدأ مشروع، لا تستهين بالسؤال. سؤالك واستشارتك اهيا اول خطوات استثمارك في نفسك ومشروعك. كل دينار تصرفه في الاستشارات، بيرجع لك أضعاف لما تشوف مشروعك يكبر بسبب أنك تجنبت مشاكل وتحديات غيرك طاح فيها وانت عديتها بسهالات بدون ما تكلفلك مثل ما كلفتهم

 📣

واليوم انا اقدر اساعدك بالاستشارة وامشي معاك خطوه خطوه بالدرب الصحيح بأذن الله

اتمنى لك كل التوفيق والنجاح يارب

اخوك

شرايك بنشرة اليوم ؟

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها