💙 السلام عليكم وجمعة مباركة

اليوم بقول لك موضوع مهم ولازم نركز فيه لأن فعلاً بغير طريقة تفكيرك وتعاملك مع مشروعك، سواء كنت ناوي تفتح مشروع جديد أو عندك مشروع وودك تطوره، أو تبي تشتري مشروع

الموضوع هو الاستشارات ومختصرها البسيط اهو السؤال

الاغلب ممكن يظن ان الاستشارات مضيعه للوقت والمال، ولكن تأكد ان في المشاريع تحتاج لو معلومة وحده عشان تساعدك تاخذ قرارك

ليش الاستشارة مهمة؟

لان تساعدك تختصر الوقت وتوفر الفلوس، وتجرب أشياء جديدة بدون ما تخاف لان غيرك جربها وعطاك الزبدة

وجود استشاري معاك مثل وجود صديق يعرف كل الأماكن السرية في اللعبة، بساعدك توصل لأبعد نقطة ممكنة بدون ما تضيع

انوع الاستشارات

استشارة عامة

هذه اول خطوة تسويها واهيا هدفها أنك تسمع كل النصائح الأساسية والأمور الواجب تتعلمها في التجارة وإدارة مشاريع تجارية، هذا النوع من الاستشارات يعتبر مثل الخبز والزبدة لأي مشروع (واضح اني يوعان وانا اكتب لك 🫠 ) فتحتاج تضبط الأساسيات عشان تقدر تأخذ الدرب وانت عارف واجباتك واحتياطاتك ومجهز خططك. على سبيل المثال

١- ادارة الوقت: شلون تنظم وقتك وتقدر توزع مهامك بدون ما تضغط وتحرق نفسك

٢- التسويق والبيع: شلون توصل لعملائك وتجذبهم وتبيعهم منتجك او خدمتك

٣- ادارة الفريق: شلون تختار فريقك وتحفزهم وتسوي هيكل تنظيمي قوي

٤- التوظيف: شلون اوظف ومن وين احصل موظفين وشنو اهم الشروط

٥- الادارة المالية: تتعلم اساسيات ادارة المال في المشاريع وشلون تدير الميزانية والتدفقات النقدية

٦- الامور القانونية: تتعرف اكثر على القوانين والكيان القانوني المناسب لمشروعك

منو استشير فيها ؟

شخص يفهم بالتجارة والمشاريع، شخص عنده حسن الإدارة، شخص خاض سنين في ريادة الاعمال، جرب وتعلم وراح تستفيد وايد من خبرته ومسيرته

استشارة متخصصة

هدفها انك تسمع ناس شغاله في المجال نفسه وتبي تتعلم من خبرتهم ونصايحهم

على سبيل المثال بتشتري مطعم، وااااايد مهم ترفع التلفون على احد عنده مطعم مو شخص عنده صالون !!! (لان مشروع عن مشروع يفرق)

تروح تأخذ استشارة مع شخص اشتغل في المطاعم، عنده علاقات مع المطاعم، يعرف معلومات كبيرة عن المطاعم

ليش عبدالله ؟ لان تبي تعرف شنو اهم الصعوبات والمشاكل في تشغيل وإدارة مطعم وشنو اشياء اهو طاح فيها عشان انت ما تطيح فيها وشلون يدير المطعم وشنو عنده من أدوات بتساعدك في ادارتك وتطوير مشروعك

هذه الاستشارة وايد مهمة وضرورية قبل ما تأخذ خطوتك وتشتري لان بتختصر عليك شغل سنين وتوفر عليك أخطاء تكلفك الاف الالاف

ختام الكلام

إذا عندك مشروع أو ناوي تبدأ مشروع، لا تستهين بالسؤال. سؤالك واستشارتك اهيا اول خطوات استثمارك في نفسك ومشروعك. كل دينار تصرفه في الاستشارات، بيرجع لك أضعاف لما تشوف مشروعك يكبر بسبب أنك تجنبت مشاكل وتحديات غيرك طاح فيها وانت عديتها بسهالات بدون ما تكلفلك مثل ما كلفتهم

ابيك تشوف هذا المقطع من ورشتنا السابقة، شرحت فيه أهمية الاستشارات وعطيت عليه 🎥قصص من تجارب مشترين عشان يوضح الموضوع اكثر

والحين اذا حاس تحتاج تستشير احد، ما راح اخليها بخاطرك 📣

لأول مره راح أسويها، بفتح مجال لـ ١٠ استشارات فقط!! عن طريق اتصال مدته ١٥ دقيقة ومجاناً 💥 

للعلم هذه الفرصة لكم انتم فقط (مشتركين النشرة 💙)

راح نسكر التسجيل من نكتمل ١٠ استشارات

!خلك واصل

 اول مجتمع متخصص في بيع وشراء المشاريع التجارية في وطنا العربي

بناء علاقات وخبرات

مشاريع وفرص استثمارية حصرية

دليل شامل لموارد وادوات تفيدك

اتمنى لك كل التوفيق والنجاح يارب

اخوكم

شرايك بنشرة اليوم ؟

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها