أدري إنك تطمح تسوي مشروع, وانا ابي اساعدك

أذكر عدل، شلون كان بخاطري اسوي مشروع وانا اشوف المشاريع الصغيره من لما كنت بالجامعة وهم لما توظفت كنت ادور على مشاريع وافكر شنو اسوي ماعرف؟ شنو بخاطري ومن وين ابلش

وفعلاً، من رجعت للكويت من بعد الدراسة بالخارج وبعد سنتين من الشغل كموظف، أسست أول مشروع لي من الصفر حرفيًا، والي كلفني وااااايد اكثر مما تتخيل، تحديات كانت اكبر مما توقعت وخبرتي بريادة الأعمال كانت صفر

المشروع ما كان مربح، كان اختياري للموقع، شكل المحل، وفريق العمل كله غلط بس تعلمت من هذه التجربة وايد امور واليوم انا قاعد اكتبلك هذه النشره عشان اعطيك الخلاصة لان ما ابيك تطيح في هذا الغلط مثلي

أسست مشروع ثاني، ونجحت فيه شلون وليش ؟ شنو الي فرق ؟ راح اقولك

وخلال هالرحلة، تعلمت شلون أسوّي مشروع ناجح، وأتفادى مخاطر كثيرة، لا يعني الواحد اذا تعلم يعني ما راح يخسر مره ثانيه، بلى التجارة يوم ربحان ويوم خسران بس الشاطر الي يتعلم من اغلاطه ويتفاداها ويكون جاهز لكل تحدي وعوار ويقوم يوقف من يطيح

وأنا اليوم بشاركك بأهم النقاط اللي تساعدك تسوّي مشروع ناجح

…لا تسوّي مشروع

١- إلا اذا، مستعد تغير بيئتك

الانسان نتيجة اقرب خمس اشخاص له

البيئة اهم عامل من عوامل نجاح اي مشروع، كل ما اختلط مع الناس الصح والناس الي سابقينك في مراحل بعيده عنك، راح تتعلم منهم على طول وتصير تشبهم يوم عن يوم، ف ابحث عن الشخص ال تشوف نفسك فيه في المستقبل واقضي معاه وقت كثر ما تقدر

٢- إلا اذا، تضبط تفكيرك وعقليتك (المايند ست)

كل ماكان عندك طموح اكبر، كلما راح تاخذ قرارات وخطوات اكثر، وكل ما خذيت قرارات راح تشوف نتائج، ومن تشوف نتائج راح يزيد ايمانك في نفسك وفي عملك وفي كل شي حولك. وهكذا تدور دورة الحياة الناجحة. بلخصلها لك مره ثانية بهذه الرسمة

٣- إلا اذا، فهمت شنو يعني تسويق

الاغلب يظن ان التسويق اهو انك تعطي فلوس لشخص عشان يصور لك ومبروك راح يجون لك الناس وبتنجح ! ياريت بهذه السهولة مثل ما الناس تعتقد

اول خطوه بالتسويق اهيا انك تحدد وتعرف الفئة المستهدفه بمعنى لو تشوف شخص بالشارع راح تقدر تعرف ان هذا ممكن يكون عميلك من شكله من لبسه من اسمه من عمره من المكان الي يحب يروحله و و

لو الحين اسألك سؤال، لو نبي نحط لك اعلان في الشارع، في اي منطقة راح تختار ؟

راح تعرف تجاوب على هذا السؤال لما تكون عارف شكل عملائك وحياتهم عشان توصل لهم بأسرع وقت واقل تكلفة

التسويق اهوا انك توصل للناس المستهدفين لعلامتك التجارية ويصير عندهم اهتمام ان يتعاملون معاك وبعدها يدخل موضوع ومهارات السيلز عشان يدفعون لك ويستفيدون من خدمتك

التسويق عبارة عن كمية مشاعر لازم توصلها في قلوب الناس وليس لعقلهم، ركز فيها عدل وقيسها على الماركات الي تشتريها وكل شي حولك، هل تشتريه بعقلك ولا بمشاعرك؟ هل تشتري عشان قوة المنتج ولا عشان التجربة الي بتمر فيها والشعور بالكشخه والنظافه والراحة؟

٤- إلا اذا، استشرت الناس الصح

لما تستشير احد غيرك مو معناته انت جاهل وماتعرف تاخذ قرار، لما تستشير احد انت قاعد تختصر على نفسك شوط من الخبرة والمشاكل والادوات والعلاقات والافكار والتكتيكات ووايد امور قاعد تختصرها على نفسك الي بتساعدك انت توصل للمطلوب ولنجاح مشروعك

لا تستهين باستشارة غيرك، حتى لو عنده اشهر من الخبره فقط، يكفي ان اخذ خطوه وجرب وانت مهم تسمع تجربته واكيد بتاخذ منها عبره ودرس وبتخليك تطبقه بشكل مباشر او غير مباشر في مشروعك خصوصاً في الامور القانونية، الادارية، والمالية

الخلاصة

بعد تجربتي في تأسيس اكثر من مطعم وكافيه ومتاجر الكترونية، ادري شكثر صعب الموضوع والاصعب اهو عدم معرفتك ان هذا راح ينجح او لا !!!!!! لان مافي شي مرسوم وواضح جدامك لا ارقام ولا خطة ادارية وتسويق ولا حسابات ولا عقود ولا شي

لذلك تشوفني اتكلم وايد عن شراء مشاريع وان الشراء راح يسهل عليك الرحلة مثل ما سهلنا الرحلة انا والفريق على اكثر من ١٩٦ مبادر وطموح قرر يسوي له مشروع وساعدناه في شراء المشروع المناسب له بأفضل سعر وأأمن طريقة ولله الحمد

في عدد كبير من المشاريع الممتازه ما شاء الله معروضة في منصة مُشتري، خذ لك نظره على المشاريع واذا عجبك اي مشروع، تواصل مع الفريق واخذ استشارة مجانية مع مستشار مشاريع عشان ياخذك خطوه بخطوه بالطريقة الصحيحه للشراء وضمان حقك ومشروعك

✌️ هذه فرصتك تسوي لك مشروع

اذا عندك استفسار، تواصل مع الفريق اضغط هنا

!خلك واصل

🌍 اول مجتمع متخصص في بيع وشراء المشاريع التجارية في وطنا العربي

بناء علاقات وخبرات

مشاريع وفرص استثمارية حصرية

دليل شامل لموارد وادوات تفيدك

اتمنى لك كل التوفيق والنجاح يارب

اخوك

شرايك بنشرة اليوم ؟

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها