شلون تختار مشروعك؟

دايماً الناس تسألني: شنو أفضل مشروع أبدأ فيه؟

جوابي هذا اقوله في كل مكان وزمان وبكل مقابلة عامة وخاصة

ما في “أفضل مشروع” للجميع… في أفضل مشروع لك إنت

كلنا مختلفين في طاقتنا، في وقتنا، في خبرتنا، في علاقاتنا، في ظروفنا، وحتى في طموحاتنا

إذا تبي تبني مشروع ناجح، لازم تختار المشروع الصح لك إنت، مو الصح للناس

وأنا دايم أقول إن اختيار المشروع يعتمد على ثلاث أشياء

 ١- شنو عندك مهارة؟

إذا تقدر تسوي شي بإتقان، سواء طبخ، تسويق، تصوير، ترتيب عمليات… هذه مهارة تقدر تبني عليها مشروع.

٢- شنو علاقاتك؟

علاقاتك ممكن تكون مصدر قوة، سواء موردين، عملاء محتملين، أو حتى شركاء.

في ناس بنوا مشاريع فقط لأن عندهم باب مفتوح في مجال معيّن.

 ٣- شنو الشي اللي تحبه وشغوف فيه؟

مو كل شي تحبه وتروح تسوي فيه مشروع لازم ينجح! ماله علاقة مباشرة، اقصد من هذا السؤال شنو العمل الي بولع فيك النار من داخل وتقدر تشتغل عليه ليل ونهار والي بتقدر تتحمل التعب، وتطور نفسك وتواجه مشاكل من قلب

دايماً فكر بصوت عالي بالاجابات ولاتستحي من نفسك وحتى وان كانت الفكرة والإحساس سخيف “اسف على التعبير” بس ابي اوصلك سهولة وبساطة الموضوع عشان ما تصعبها على نفسك

وللعلم أغلب المشاريع اللي شفناها في مُشتري، وفعلاً نجحت وانباعت بملايين الدنانير… كان فيها توازن بين هالعناصر الثلاث

🚨 وبهالمناسبة، الأسبوع القادم عندي دورة بعنوان

فن وأسرار بيع وشراء المشاريع بإحترافية وأمان

وراح أتكلم فيها أكثر عن شلون تختار المشروع المناسب، وشلون تشتري مشروع بدل ما تبدأ من الصفر عشان تقل عندك نسبة المخاطرة شوي، و بنتكلم عن خطوة بخطوة، ومن واقع تجارب

لكن حتى لو ما حضرت، تذكر دايمًا

اختيارك للمشروع مو قرار عشوائي… هو قرار راح يحدد شنو راح تسوي، شنو راح تتعلم، وشنو راح تكسب وتخسر، رحلة جميلة والله استمتع فيها

اهم شي، تستعجل… بس لا تتردد واخذ خطوه

اتمنى لك كل التوفيق والنجاح يارب

اخوك

شرايك بنشرة اليوم ؟

اذا ما لحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها