اصعب قرار ...اهو متى توقف؟

الكل يتكلم عن البدايات شلون تبدأ مشروع؟ شلون تطور؟ شلون تكبر؟

بس نادر أحد يقولك: شلون توقف؟ 

وأحيانًا، القرار الأصعب في حياة المبادر، مو الانطلاقة هو التوقف

مو كل مشروع مفروض نتمسك فيه للأبد

مو كل فكرة تستحق نكمل معاها … في مشاريع تبدأها، وتحط فيها وقتك، وفلوسك، وطموحك، بس مع الوقت… تكتشف إنك قاعد تسحبها معاك غصب

يمكن صار حمل ثقيل، يمكن تغير السوق، يمكن تغيرت أنت ….. بس تحس بالذنب اذا بتوقف، تحس انك بتخون تعبك ونفسك والي اشغلوا معاك وحتى الصوره الي رسمتها حق لنفسك قدام الناس

بس الحقيقة؟

أنت ما وقفت لأنك فشلت… أنت وقفت لأنك نضجت، تعلمت، جرّبت، وعرفت متى تكمّل، ومتى تعطي نفسك فرصة جديدة بفكرة أنضج، بسوق أوضح، بذهن أهدى

أنا عن نفسي… مرّيت بهذا القرار

مشاريع سكّرتها، وخسائر خذيتها بصدر مفتوح مو لأن الفكرة كانت غلط، لكن لأن وقتها خلص، أو لأني تغيّرت وهذا مو ضعف، هذا قوة

قوة إنك ما تعلّق نفسك في مكان، وأنت تعرف إن قلبك مو هناك

الزبدة

الذكي والشاطر مو اللي يعرف متى يبدأ، الي يعرف متى يوقف ويبدأ من جديد بطاقه جديدة بخبره كبيره

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها