اليوم ودي أخذك خطوة جدام، تساعدك تطوّر وتكبر مشروعك

وايد من أصحاب المشاريع، الي يطمحون يبدأون مشروعهم، يدورون على تمويل عشان ينطلقون، يوسعون انشطتهم، ويحققون أهدافهم الاستراتيجية والمالية

ومن هني يبدأ البحث عن مستثمر

الرحلة ممكن تكون صعبة إذا ما عرفت شلون توصل للمستثمر، تقنعه بفكرتك، مشروعك، وأهدافك المستقبلية، أو إذا قدمت نفسك ومشروعك بشكل غلط

اليوم ببسطها عليك وبعطيك اهم النقاط والتوصيات والتجهيزات الي بتحتاجها في رحلة البحث عن استثمار، حلوويين ؟ شوف معاي

١- انت والفريق

انت صاحب الشركة وصاحب الفكرة وصاحب الطموح وعارف كل صغيره وكبيره ف بدونك ماكو مشروع عدل ؟ فـ أول شي بشوفه فيك المستثمر (انت) اي انت، شخصيتك، ادارتك، طموحك، فهمك ووعيك واسلوبك … لان بالنهايه اهو براهن عليك وعلى الفريق بختصار مو على المشروع ولا فكرتك

المشروع الي يطلع دينار ممكن يطلع باجر مليون صح ؟ والي يطلع مليون اليوم باجر ممكن يفلس صح ؟ شنو السبب ؟ السبب انت وادارتك وطموحك وافكارتك وعزيمتك وبسبب فريقك !! فـ اهم شي تتعب عليه اهو ترتيب فريقك وتبرز نقاط قوتك وتكون صادق وامين جدام الناس والعملاء مو بس المستثمرين اكيد

٢- البيئة

متفقين ان ماراح تحصل مستثمر بالبيت ولا بالدوانيه ؟

ف بختصار، تروح وتسعى وتتواجد في الاماكن والبيئة الصحيحة والصحيه للمشاريع وريادة الاعمال من مؤتمرات، ايفينتات، معارض، اجتماعات. ضروري يكون لك ولمشروعك تواجد في هذه الاماكن

٣- ارقامك

الحين برافو لقيت المستثمر وانعجب بشخصيتك وبقوة الفريق ولكن انت ماعندك ولا درايه عن ارقامك

كصاحب مشروع لازم تفهم أرقام مشروعك، جم قاعد تبيع وتشتري، شنو الإيرادات الحالية، شنو التوقعات للسنين القادمة، شنو التكاليف الثابته والمتغير، صافي الارباح، الاصول وقيمة استهلاكها وغيره من مصطلحات وارقام لازم تكون مجهزها وفاهمها مو بس احد مجهزها لك وحافظها

المستثمر عنده أسئلة لك فلازم تجاوبه قبل ما يسألك وهذه يوضح قوة فهمك وخبرتك واستعدادك للنجاح

والاهم ان لازم تعرف جم طالب رأس مال ؟ مقابل جم سهم من الشركة ؟ شنو تقييم الشركة ؟ وشنو بتسوي بهذه الفلوس وشلون بتصرفهم ؟

 عشان يكون عندك جواب لهذه الاسئلة، لازم تجهز ارقامك القديمة وتفهمها عدل ،تستنتج منها معطيات وبعدها تجهز دراستك الاستراتيجية والمالية للسنين القادمة

Pitch Deck ٤- عرض تقديمي

كل الي شرحته لك فوق، تلخصه وترتبه في برزنتيشن يتكون من ١٠-١٥ صفحه بالكثير، فيه ملخص عن قصة المشروع وخدمته ونموذج العمل، وشلون يدخل فلوس، والفريق والارقام الحالية للمشروع والخطة المستقبلية وقيمة الشركة وجم طالب مبلغ وشلون بتصرفه، هذا بختصار ولكن انت وشطارتك شلون تسوي هذا البرزنتيشن يشد المستثمر والاهم اكيد ؟ إلقائك وشرحك له

 هذه منصة (اضغط هنا) تسهل عليك التجهيز

Data Room ٥- داتا روم

الداتا روم عباره عن ملف تسويه اونلاين عن طريق قوقل درايف فيه كل التفاصيل المتعلقة بمشروعك من عقود الموظفين، الرخص التجارية وعقود التأسيس، الخطه الاستراتيجيه، الدراسات المالية، دراسة تقييم المشروع، العقود القانونيه مع الموردين والعملاء، وغيره من تفاصيل تعتمد على نوع ونشاط المشروع

وهذا مثال عن الداتا روم (اضغط هنا)

٦- نوع المستثمر

قبل ما تقابل أي مستثمر وتطلب منه فلوس، ادرس هذا المستثمر

هل هو مستثمر تقليدي يحب يستثمر بمشاريع تقليدية؟

أي مستثمر تبي مستثمر ملائكي او شركة استثمارية (الفرق بينهم)

هل هو يركز استثماراته بمجال واحد يعني بالتكنولوجيا ولا المطاعم ولا المدفوعات ؟

هل يقدر يستثمر 100,000$ ولا 10,000$ شنو ميزانيته ؟شنو قدراته؟

لازم تسوي الهوم ورك مالك صح عشان لا يضيع وقتك وانت تركض ورا الناس الغلط وهم وايد مهم انك عارف ودارس الشخص الي رايح وتقابله عشان تجذب انتباهه ويركز معاك

٧- استشارة

قبل لا تروح لأي مستثمر، اطلب استشارة من اصحاب مشاريع مسوين جولات استثمارية من قبل واسمع من اكثر من واحد عشان تكون جاهز ومتعلم من أغلاطهم، لان مو كل مستثمر يستاهل يكون معاك، لازم هم تقييمه وتشوفه مناسب لك، ولا بكون مزعج وسمعته تضرك، دير بالك واسأل واستشير قبل ماتاخذ هذه القرارات

اذا انت قاعد تمر في هذه المرحلة وقاعد تجهز مشروعك لجولة استثمارية، اقدر اساعدك فيها بالكامل ان شاء الله، احجز استشارة عشان نرتب لك خطة استثمارية تناسب مشروعك

اذا عندك استفسار، تواصل مع الفريق اضغط هنا

!خلك واصل

🌍 اول مجتمع متخصص في بيع وشراء المشاريع التجارية في وطنا العربي

بناء علاقات وخبرات

مشاريع وفرص استثمارية حصرية

دليل شامل لموارد وادوات تفيدك

اتمنى لك كل التوفيق والنجاح يارب

اخوك

شرايك بنشرة اليوم ؟

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها