مو كل زحمة نجاح

في ناس تفتح مشروع، وتشوف المحل زحمة، الإنستغرام متروس، والناس تمدح

وتقول: أكيد هذا ناجح، خل نسوي نفسه

مو كل مشروع عليه ضجة يعني فعلاً ناجح

وايد من هالمشاريع تخسر واهيا زحمة

ليش؟

لأن الأرقام ما تسند الضجة والضغط يخرب خدمة العميل والقيمة والكوالتي

هذا في حال ان الضجة مو مدروسه ولا اهيا من ضمن الاستراتيجية في التسويق والتسعير والخدمة

اعرف مطعم يبيع مليون دينار كويتي سنوياً، ترا رقم كبير على مطعم عنده ٣ افرع وتوصيل

تتوقع جم ارباحه ؟ صفر دينار كويتي 

ترا الاغلب يبيع عادي ماعنده مشكله ولكن هامش الربح ضعيف، أو تكاليف التشغيل عالية

والمصيبة؟ صاحب المشروع ماعنده محاسب ولا بيانات ماليه شهرية ولا يعرف يقرأ الأرقام، وكل شهر يشتغل بس عشان يغطي الخساير

الزحمة مو مقياس، ولا عدد الفولوورز

النجاح الحقيقي؟ تشوفه بالدفاتر المالية والمحاسبية وتقراهم وتفهم كل تفاصيل المصاريف والايرادات

النجاح بإدارتك للتدفق النقدي عشان تضمن المشروع يظل شغال وبأرباح

أنا شخصاً في البدايات كنت أظن إن الشهرة ومشروع عليه زحمة وشكل واو = أرباح وحيااااة مليونير

لكن أول ما دخلت السوق فعلياً، عرفت إن الإدارة أهم من الشكل

وإن بدون نظام، بدون أرقام واضحة، بدون تحليل… المشروع ما راح يصمد

شلون تقيس قوة ونجاح المشروع؟

١- جم صافي الدخل يوصلك شهريًا؟

٢- هل تقدر تطور المشروع أو تفتحه بمكان ثاني؟

٣- هل لو سافرت أسبوع، المشروع يستمر؟

٤- هل المنتج مربح؟

فلا تنغر بالظاهر… واشتغل على الجوهر

تابع حساب اكاديمية مُشتري قاعد نتكلم عن كل الاخطاء الي لازم تتجنبها في رحلة ريادة الاعمال اضغط هنا

اتمنى لك كل التوفيق والنجاح يارب

اخوك

شرايك بنشرة اليوم ؟

اذا مالحقت على كل نشراتنا من البداية، اضغط هنا وشوفهم

واذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتك من صديق، اشترك الان مجاناً ليصلك جديدها