دير بالك

قالولك ريادة الأعمال سهلة؟ تصير مدير نفسك؟ وتداوم بالوقت اللي تبي وتطلع متى ما تحب

والكافيهات هبة؟ والمطاعم سهله والتطبيقات تطلع ملاييييين

كل الي اقدر اقولك ياه دير بالك

وايد ناس ينجذبون لفكرة ريادة الأعمال، ويشوفونها فرصة لتحقيق أحلامهم لكن في حقيقة الأمر، ريادة الأعمال تحتاج أكثر من مجرد فكرة! تحتاج إلى فهم ودراسة للسوق، مهارات جيدة، وتخطيط سليم ولأصدقائنا الي يعرفونا عدل تحتاج لعشم والي مايعرفها اقولك عنها تالي في الورشة

بعض الناس يبدأون مشاريعهم بناءً على ما يشوفونه في السوشيال ميديا أو سوالف بالدوانية ولا جمعة رفيجات، لكن ما ينتبهون للأخطاء اللي ممكن يطيحون فيها! وما يدرون ان السوشل ميديا والقصص الي تسمعونها اهوا الجزء الحلو بس! ونادر ما تسمع ناس تقولك عن الأغلاط الي طاحت فيها

وادري في بالك الحين تسألني شنو أهيا الأغلاط ؟

اختيارك للمشروع من الاساس -

وايد ناس تشوف مشروع ناجح يروحون يسون نفس النشاط وبالعكس انا ابداً مو ضد ! بس تعال هل فكرت شوي ليش هذا ربحان؟ هل من النشاط ولا من التسويق؟ ولا من علاقات ؟

ما يدرسون السوق -

ادرس السوق واسأل واستشير! من استشار ماضاع

قبل ما تبدأ، لازم تسوي دراسة للسوق، شنو الطلب على المنتج أو الخدمة اللي تبي تقدمها؟ منو جمهورك أصلا؟ شنو المنافسة اللي راح تواجهها؟ هالمعلومات تساهم في تحديد استراتيجيتك وتوجهك وبناء البراند كله من الأساس. إذا ما عندك فكرة عن السوق، راح تتخبط وتضيع وقتك وفلوسك

التخطيط العشوائي -

من أهمية هذه النقطة تكلمنا عنها بروحها بنشرة الأسبوع الي طاف! بس بالمختصر ان التخطيط مهم، لكن بعض الناس يبالغون فيه، يفكرون في كل تفاصيل المشروع من الألف إلى الياء، لكنهم ما ينفذون أي خطوة وهذا الشي يسبب إحباط وتردد، مما يجعلهم يظلون في دوامة التفكير دون تنفيذ

إهمال التكاليف -

لازم تكون واعي للتكاليف المرتبطة بالمشروع. من إيجار المكان، إلى المواد، إلى التسويق التوظيف التدريب. أغلب المبتدئين ما يفكرون بهذا الموضوع بالطريقة الصح! يعني يعتقد اذا فتح المشروع اليوم باجر بيكون بحسابة رقم ب 6 أصفار! فتلاقيه يصرف مبالغ على التجهيز ولما ايي للواقع تلاقي ما عنده فلوس للتشغيل! ولأي سبب يصير يتوهق ويقرر يبيع مو لان البزنس مو زين! لان ببساطة غلطته اهو ما حسبها صح! فتأكد دايما إن عندك ميزانية واضحة

الخوف من الفشل -

الناس في بعض الأحيان يخافون من الفشل لدرجة أنهم ما يجربون بس الحقيقة إن الفشل جزء من رحلة نجاحك واهم جزء فيها انك تتقبل فكرة الفشل كجزء من عملية التعلم

شلون أتجنب كل هذه الأغلاط؟

عندي لك هذا الخبر حلو

اليوم وباجر (السبت والاحد) مجهز لك اقوى ورشة مجانية حضورية عن شلون تسوي مشروع ناجح ليش قتلك اقوى ؟ لان مختصر فيها خبرة عمل سنين و وتعليم من شتى انواع الدورات والمحاضرات والعلاقات ولله الحمد

وبيكون معاي أخوي خليل حياة بيتكلم عن التسويق بالمحتوى وأخوي محمد الدويش بيتكلم عن رحلة ريادة الأعمال

تفاصيل الورشة

مدتها يومين

تبلش اليوم ٢٦ اكتوبر ٢٠٢٤

الساعة ٧:٣٠ مساءً - بتوقيت الكويت

لوكيشن الورشة في الجامعة الاسترالية (اضغط هنا)

💙 الحضور مجاناً لجميع المبادرين والطموحين

وراح يتم توزيع شهادة حضور وتقدير لكل من يحضر الورشة بالكامل

مقدم الدورة، أخوك عبدالله، شريك مؤسس والمدير التنفيذي لمنصة مُشتري

اذا عندك استفسار، تواصل مع الفريق اضغط هنا

اتمنى لك كل التوفيق والنجاح يارب

اخوك

شرايك بنشرة اليوم ؟

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها