انك تأسس مشروع ويكون ناجح أبداً مو سهل وفيه خوف كبير لان وايد امور وعوامل مجهولة جدامك ولكن الخوف المستمر راح يمنعك تاخذ أي خطوة

لا تظن ان وراء اي مشروع ناجح كانت حياة وردية !!! شفت وتعرفت على مئات وألاف اصحاب المشاريع وشفت شنو يمرون فيه يومياً، نفس ما انت قاعد تمر او راح تمر فيه ولا تظن انك بروحك عايش شعور التعب والفشل!!! تأكد ان استمرارك وإصرارك بحد ذاته نجاح وقوة

الخوف والفشل اهما متعة الرحلة، اهما الدافع، اهما الوقود، اهما بيدفعونك لاتخاذ قرارات وخطوات تجاه طموحك وحلمك، وصدقني الفشل اللي تخاف منه اليوم اهو الي يبني شخصيتك ومعرفتك ومهاراتك مو النجاح لأنك ما تتعلم شي من النجاح غير نعمة الله عليك سبحانة وتعالى

أنا هدفي في هذه النشرة أساعدك وأعطيك نصايح توفر عليك أخطاء البدايات والاغلب يغلط فيها

بعطيك ٣ اسرار ان طبقتها على مشروعك اوعدك بينجح من بعد توافيق الله، ركز معاي

Ideal Customer ١- اعرف عميلك المثالي

مو الكل يعاني من المشكلة اللي تحلها بخدماتك أو منتجاتك، ولا الكل يشاركك مبادئك وثقافتك، ومو الكل يدور على نفس الحل حتى لو كان يعاني من المشكله. لازم تعرف شكل عميلك، ذكر او انثى، العمر، الجنسية، الشكل واللبس، المنطقه الي عايشين فيها، المهنة ومقر العمل وغيره من معطيات الي بتساعدك لو تشوف اي شخص بالشارع تعرف ان هذا عميل محتمل للمشروع او لا، كل هذا يساعدك تفهم عميلك وتعرف شلون تحصله وتوصل له بأسرع وقت واقل تكلفه

:عميلك المثالي هو اللي

يعاني من مشكلة تقدر تحلها بشكل ممتاز ←

يهتم بالحل اللي تقدمه انت، مو أي حل ←

يشاركك مبادئك ويقدّر القيمة اللي تقدمها ←

عنده الفلوس الكافية ومستعد يدفع لك ←

تخيل هذا الشخص، ارسمه، عطه اسم، ودوّن كل صفاته وكل التفاصيل اللي تخصه، وروح دور عليه

لما تعرف عميلك المثالي عدل، اقناعه يصير أسهل

:أعطيك مثال عن شركة تسويق

الكل يحتاج التسويق، بس هل كل شركات التسويق عندها نفس العملاء المحتملين؟

لا! بعض الشركات تركز على تمكين النساء، بعضهم يركز على المشاريع الصغيرة والمتوسطة، وبعضهم يخدم الشركات اللي تنتقل من أرباح مليون دولار بالسنة إلى مليون دولار بالشهر

Irresistible Offer ٢- عط عميلك عرض ما يقدر يقاومه (عرض خيالي)

كلنا نشوف الشركات العالمية وبعض المحلية يقولك اول شهر مجاناً، اذا ماعجبتك الخدمة نرجع فلوسك، اشتر ٢ واخذ الـ ٣ مجاناً

كل مشروع عرضه مختلف عن الثاني حسب طبيعته وحاجة الناس له، المهم انك تعطي اوفر وعرض يكسر فيه خوف العميل من تجربة منتجك او خدمتك ويقول “ليش لا !! خل اجرب مو خسران شي” الهدف انك تستحوذ على العميل بسهولة ومن بعدها لازم تبدع وتحافظ عليه وتقدم له افضل خدمة ومنتج عشان يستمر معاك

Over Deliver, Under Promise ٣- تجاوز التوقعات (قدم أكثر، لا توعد)

ماتبي عميل راضي ويقول “ايي يعطيكم العافية” !!!! تبي جمهور لمشروعك مثل الجمهور الي يروح مباراة كرة ويستذبح ويصرخ ويشجع من قلب ويحبهم ويحس بالانتماء لهم

انزين عبدالله شلون اسوي جمهور لمشروعي ؟

لا تبيع عميلك أوهام وأحلام كبيرة ما تقدر تحققها، ولا توعده بأشياء كثيرة ما تقدر تسويها، لأنه راح يحاسبك عليها، وراح يطلع غير راضي حتى لو حققت له الخدمة الي طلبها

اوعده بالمعقول بمقدار ٧٠٪، ولكن قدم له أكثر من ماهو متوقع بمقدار ٣٠٪ (بدون ما تقوله عنها) وجذي توقعاته بتكون محدودة، بس المجهود الإضافي والنتائج راح تفرحه وترضيه وايد وتفوق توقعاته

على سبيل المثال ←

لو تطلب طلبيه من امازون ويقولك ترا راح يوصل طلبك خلال ٣ اسابيع، وصج وصل خلال ٣ اسابيع شنو راح تقول ؟ “زين حمدالله وصل بالوقت” ولكن تخيل معاي لو وصل بأسبوع بدال ٣ اسابيع شبتقول ؟؟ “سووووووبر وسريعين ما شاء الله وماراح اطلب الا منهم من اليوم ورايح.” راح تسولف حق الكل عن السرعه وجذي امازون خلق له جمهور وليس عميل راضي 😄 

اهو يدري يقدر يوصله لك بأسبوع ولكن شنو قلنا ؟ اوعد العميل بالقليل ولاتعطيه خطتك كامله عشان يحس ان انت قدمت له اكثر من المطلوب 🫶 

وانا شخصياً اطبق هذا السر على مشاريعي والحمدالله النتائج جميلة

التحديات كبيرة والاستراتيجيات كثيرة، وما ينفع نختصرها بنشرة، لأن كل مشروع له حلوله وطريقته الخاصة

الحين اذا مهتم انك تطبق هذه الاستراتيجية “سر نجاح المشاريع” على مشروعك وتبي اساعدك فيها، احجز استشارة عشان نفهم طبيعة المشروع وندرسه وبعدها نقرر شنو المناسب له

✌️ هذه فرصتك تسوي لك مشروع ناجح

اذا عندك استفسار، تواصل مع الفريق اضغط هنا

!خلك واصل

🌍 اول مجتمع متخصص في بيع وشراء المشاريع التجارية في وطنا العربي

بناء علاقات وخبرات

مشاريع وفرص استثمارية حصرية

دليل شامل لموارد وادوات تفيدك

اتمنى لك كل التوفيق والنجاح يارب

اخوك

شرايك بنشرة اليوم ؟

اذا تعرف احد بفيده هذا المحتوى لا تبخل عليه بالفائدة وشاركه بهذا الايميل

واذا هذه النشرة واصلتلك من صديق، اشترك الان مجاناً ليصلك جديدها